Milliy libos – oilaning muhim tarixiy qadriyati

 Har bir oilaviy qadriyatning o‘ziga xos xususiyatlari mavjud bo‘lib, ularga amal qilish oila ma‘naviyatini shakllantirishning muhim omili hisoblanadi. Har bir millatning, har bir xalqning o‘z milliy liboslari mavjudki, ular jamiyat, mamlakat, millat va shaxsning ma‘naviyatini belgilovchi qadriyatlardan biri sanaladi.

 Liboslarning milliy qadriyat sifatida shakllantirish uzoq tarixiy taraqqiyotga borib taqalib, xalq va millatning milliy qiyofasi, ya‘ni imijini namoyon etadi. Libos insonga nafaqat ko‘rk bag‘ishlaydi, balki uning odob-axloqi, dunyoqarashi, fe‘l-atvori, ma‘naviyati darajasini, umuman olganda, qandayligini ko‘rsatuvchi vositalardan biri hisoblanadi.

 Lekin.....

 So‘ngi paytlarda ayrim xotin-qizlarning kiyinish madaniyati haqida juda ko‘p e‘tirozlar bildirilmoqda. Ular arab, turk, eron va boshqa millatlarga ko‘r-ko‘rona taqlid qilib, kiyinish madaniyati milliy an‘analarimizdan uzoqlashayotgani bizning o‘zbekchiligimizga zidligi tanqid qilinmoqda. Bu esa yosh qizlarga o‘zining salbiy ta‘sirini ko‘rsatayotgani sir emas.

 Liboslarning qadrsizlanayotganligining sabablari nimada?

 Har bir shaxs oilada kamol topadi, uning atrofida tergaydigan ota-onasi, buvi-bobosi, amma-xolasi bor. Ammo ba‘zan ular o‘zlari qizim, jiyanim, nabiram o‘rtoqlaridan qolmasin, kam bo‘lmasin, degan maqsadda milliyligimizga zid bo‘lgan kiyimlarni kiyishga izn berayotganlariga oiladagi, maktabdagi, oliy ta‘lim muassasalaridagi muhit ham sababchidir, balki. Oiladagilarning shunday kiyimlarni kiyishni, “zamonaviy” bo‘lishni talab qilishlari qanchalik to‘g‘ri?

Libos – inson ziynati

– Biz bugun o‘z milliy liboslarimizni dunyoga tarannum qila olamiz.

– Atlas, adras, banoras, beqasam va shoyi kabi milliy matolardan tikilgan zamonaviy liboslar barcha yoshdagi o‘zbek ayol-qizlariga yarashadi, ularning husniga husn qo‘shadi. Qolaversa, bu kabi liboslar xalqimiz, ayniqsa, yoshlarimizda milliy qadriyatlarga, milliy liboslarimizga hurmat tuyg‘ularini yana-da yuksaltiradi.